– राकेश अचल
बिन्नू रोनें-गानें नइयां
रत्ती भर पछतानें नइयां
*
मैडल जाए भाड में बिन्नू
हमखों मैडल चानें नइयां
*
तुमनें धुजा खूब फैराई
नेकऊ रंज मनानें नइयां
*
थम्मा छू कें तुम बैठीं हो
ई के आंगे जानें नइयां
*
तुमें मिलौ जो मान कसम सें
और काऊ को पानें नइयां
*
हमनें जान लई सच्चाई
दुनिया खों समझानें नइयां
*
कोहिनूर हौ फोगाट बिन्नू
तुमसी कोऊ ठानें नइयां
*
जो हो गओ सो हो गओ बिन्नू
गोर हमें अब गानें नइयां
